KR tók á móti KA í 2. umferð Pepsi Max-deildar karla í kvöld. Gestirnir, ekki þekktir fyrir það að skora mikið í leikjum sínum, gerðu sér lítið fyrir og unnu óvæntan 1-3 sigur.
KA komst yfir á 10.mínútu leiksins. Þá fékk Hrannar Björn Steingrímsson boltann úti á vinstri væng, renndi honum á bróður sinn Hallgrím Mar Steingrímsson sem var staðsettur rétt fyrir utan teig KR-inga. Hallgrímur tók skotið úr góðri stöðu og rataði það framhjá Beiti Ólafssyni, markverði KR, í nærhornið. Staðan 0-1.
Heimamenn réðu illa við Akureyringanna í kjölfar marksins og náðu upp litlu spili. Gestirnir gerðu sig tvisvar líklega þegar um 20 mínútur voru liðnar af leiknum. Fyrst kom Daníel Hafsteinsson sér í gott skotfæri fyrir utan teig en Beitir varði frá honum. Stuttu síðar fóru KA-menn af stað í hættulega sókn en Grétar Snær Gunnarsson, varnarmaður KR, komst þá inn í sendingu Daníels, ætlaða Nökkva Þeyr Þórissyni sem var í góðu færi.
Um fimm mínútum síðar átti Óskar Örn Hauksson flotta fyrirgjöf á Stefán Árna Geirsson. Skalli þess síðarnefnda fór þó beint á Steinþór Má Auðunsson, Stubb, í marki KA.
Stuttu síðar hafði KA tvöfaldað forystu sína. Hallgrímur Mar átti þá frábæra aukaspyrnu rétt fyrir framan miðllínu. Boltinn rataði beint á kollinn á Brynjari Inga Bjarnasyni sem stangaði boltann í netið. Útlitið orðið dökkt fyrir KR á þessum tímapunkti.
Um tíu mínútum síðar var útlit fyrir það að KA væri að ganga frá leiknum. Grétar Snær átti þá slappa sendingu til baka á Beiti sem dúndraði boltanum í Ásgeir Sigurgeirsson. Í kjölfarið renndi Ásgeir boltanum í netið. Dómari leiksins komst þó að þeirri niðurstöðu að boltinn hafi farið í hönd Ásgeirs og markið dæmt af. Ansi erfitt var að sjá atvikið almennilega.
Rétt fyrir lok fyrri hálfleiks átti Hallgrímur Mar aukaspyrnu á mjög svipuðum stað og sú sem KA uppskar mark úr fyrr í leiknum. Hár bolti hans rataði einmitt aftur á kollinn á Brynjari Inga en í þetta skipti fór skalli þess síðarnefnda beint á Beiti.
Í uppbótartíma fyrri hálfleiks áttu heimamenn svo flott spil upp vinstri kantinn sem endaði með því að Kristinn Jónsson sendi boltann fast, meðfram jörðu, fyrir mark KA. Guðjón Baldvinsson mætti á nærstöngina og stýrði boltanum í netið. Flott framherjamark hjá Guðjóni. Leikurinn allt í einu orðinn galopinn.
Staðan í hálfleik var 1-2 fyrir KA.
Það var mjög öflugt KR-lið sem mætti inn í byrjun seinni hálfleiks. Atli Sigurjónsson átti til að mynd nokkra hættulega bolta inn á teig KA úr hornspyrnum sem ekkert varð þó úr.
Þegar um fimm mínútur voru liðnar af hálfleiknum átti Kenny Chopart svo skot rétt framhjá marki gestanna. Stuttu síðar sendi Óskar Örn boltann fyrir markið, Guðjón klippti boltann með tilþrifum að marki KA en skot hans fór þó beint á Stubb. Nokkrum mínútum síðar datt boltinn fyrir Atla innan teigs þeirra gulklæddu en hann skaut framhjá úr fínu færi.
Gestirnir gerðu sig líklega til að klára leikinn á 70. mínútu er þeir brunuðu upp í skyndisókn. Daníel Hafsteinsson, sem átti góðan leik í dag, renndi boltanum inn fyrir á Nökkva en varnarmenn KR sáu við þeim í þetta sinn.
Tæpum tíu mínútum síðar tókst þeim þó að innsigla sigurinn. Daníel kom þá með fyrirgjöf frá hægri á Hallgrím sem kórónaði leik sinn með því að skrúfa boltann neðarlega í fjærhornið.
KR-ingar reyndu að minnka muninn á lokamínútunum. Chopart átti hættulega sendingu fyrir mark KA sem enginn náði að gera sér mat úr. Þá komu heimamenn boltanum í netið á 90. mínútu en Guðjón hafði gerst brotlegur í aðdraganda marksins svo ekki fékk markið að standa.
Lokatölur, sem fyrr segir, 1-3 fyrir KA. Þeir eru með 4 stig eftir tvo leiki. KR er með 3 stig.
