Samkvæmt heimildum The Mirror, mun annað hvort Erling Braut Haaland, framherji Dortmund eða Mohamed Salah, leikmaður Liverpool, vera aðal skotmark Paris Saint-Germain í næsta félagsskiptaglugga.

Félagið er að undirbúa sig fyrir brottför Kylian Mbappe sem á aðeins átta mánuði eftir af núverandi samningi sínum við félagið en ekkert hefur gengið að reyna fá hann til þess að skrifa undir nýjan samning. PSG horfir til Haaland sem arftaka Mbappe samkvæmt heimildum Le10Sport.

Haaland er heitasti bitinn á félagsskiptamarkaðnum um þessar mundir. Hann hefur farið á kostum með Dortmund og skorað 49 mörk í 49 leikjum. PSG er ekki eina liðið sem mun reyna að klófesta framherjann, hann hefur dregið að sér athygli liða í ensku úrvalsdeildinni, þar á meðal Manchester City. Auk þess hefur Haaland gott vald á enskri tungu frá því að hann bjó í Englandi þegar faðir hans, Alf Inge Halland, spilaði þar sem atvinnumaður.

Fari svo að PSG nái ekki að klófesta Haaland mun áherslan færast yfir á Mohamed Salah sem á minna en tvö ár eftir af sínum samningi við Liverpool. Verði Salah ekki búin að skrifa undir nýjan samning við Liverpool fyrir næsta sumar gæti félagið ákveðið að selja hann í staðin fyrir að eiga hættu á að missa hann frá sér á frjálsri sölu.

Heimildir The Mirror herma að Salah vilji allt að 500.000 pund í vikulaun og það gæti reynst erfitt fyrir Liverpool að uppfylla þær kröfur.