Riðlakeppni Meistaradeildar Evrópu hófst í dag með tveimur leikjum.
Young Boys 2-1 Man Utd
Young Boys gerði sér lítið fyrir og sigraði Manchester United í fyrsta leik liðanna í F-riðli Meistaradeildar Evrópu. Leikið var í Sviss.
Gestirnir léku vel fyrstu mínútur leiksins. Þeir komust yfir á 13. mínútu þegar Cristiano Ronaldo kom boltanum í netið eftir frábæra sendingu inn fyrir frá Bruno Ferndandes.
Á 35. mínútu breyttist leikurinn mikið. Þá fékk Aaron Wan-Bissaka, bakvörður Man Utd, beint rautt spjald fyrir klaufalega tæklingu á Christopher Martins.
Gestirnir frá Manchester fóru þó með 0-1 forystu inn í hálfleikinn.
Manni fleiri voru Young Boys betri í seinni hálfleik. Nicolas Moumi Ngamaleu skoraði verðskuldað jöfnunarmark fyrir þá á 66. mínútu. Hann stýrði þá fyrirgjöf Silvan Hefti í netið.
Heimamenn voru líklegri aðilinn til að finna sigurmark leiksins. Það kom svo á fimmtu mínútu uppbótartímans. Þá átti varamaðurinn Jesse Lingard hræðilega sendingu til baka sem Jordan Siebatcheu komst inn í og skoraði. Lokatölur 2-1.
Sevilla 1-1 Salzburg
Í G-riðli gerðu Sevilla og Salzburg 1-1 jafntefli á Spáni.
Bæði mörkin komu í fyrri hálfleik og úr vítaspyrnum.
Luka Sucic kom gestunum yfir á 21. mínútu. Á 41. mínútu jafnaði Ivan Rakitic fyrir Sevilla.
