Þrír leikir hafa farið fram í 4. umferð Pepsi Max-deildar kvenna það sem af er kvöldi.

Blikar lengi að finna sigurmarkið gegn nýliðunum

Íslandsmeistarar Breiðabliks tóku á móti nýliðum Tindastóls. Heimakonur unnu nauman sigur.

Fyrri hálfleikur var bragðdaufur og náðu Blikar ekki að ógna mark gestanna mikið. Staðan í hálfleik var markalaus.

Þegar um stundarfjórðungur lifði leiks fundu heimakonur loks markið. Þá skoraði Tiffany Mc Carty. Markið skoraði hún eftir undirbúning Áslaugar Mundu Gunnlaugsdóttur. Lokatölur í leiknum urðu 1-0.

Breiðablik er með 9 stig eftir fjóra leiki. Tindastóll er með 4 stig.

Valur vann í markaleik í Eyjum

ÍBV fékk Val í heimsókn og úr varð mikið fjör þar sem gestirnir tóku stigin þrjú.

Viktorija Zaicikova kom heimakonum yfir eftir stundarfjórðung með flottu marki. Sigríður Lára Garðarsdóttir jafnaði metin fyrir Val um tíu mínútum síðar. Rétt fyrir leikhlé komst Valur yfir. Þá skoraði Lillý Rut Hlynsdóttir. Staðan í hálfleik var 1-2.

Strax í upphafi seinni hálfleiks varð Thelma Sól Óðinsdóttir fyrir því óláni að skora sjálfsmark. Staðan orðin erfið fyrir ÍBV. Þær minnkuðu þó muninn eftir klukkutíma leik þegar Delaney Bale Pridham, sem hefur verið í stuði í upphafi móts, skoraði. Bergdís Fanney Einarsdóttir gerði út um leikinn fyrir gestina á 85. mínútu með skallamarki. Lokatölur 2-4.

Valur er með 10 stig eftir fjóra leiki. ÍBV er með 3 stig.

Fyrsti sigur Stjörnunnar

Þór/KA og Stjarnan mættust á Akureyri. Gestirnir náðu í sinn fyrsta sigur á mótinu.

Leikurinn var heilt yfir fremur rólegur og stefndi ekki mikið í að það kæmi sigurmark þegar Hildigunnur Ýr Benediktsdóttir skoraði fyrir Stjörnuna í uppbótartíma. Lokatölur fyrir norðan urðu 0-1.

Stjarnan er með 4 stig eftir fjóra leiki. Þór/KA er með 3 stig.