Harry Kane, Erling Haaland, Lautaro Martinez og Andre Silva gætu allir komið til Manchester City í sumar til að fylla í skarð Sergio Aguero. Breska blaðið The Times greinir frá.
Aguero mun yfirgefa City í sumar eftir frábær tíu ár hjá félaginu. Hann hefur meðal annars unnið ensku úrvalsdeildina fimm sinnum á tíma sínum í Manchester.
Pep Guardiola, stjóri City ætlar að ná í framherja úr efstu hillu í sumar til að fylla skarð hans.
Framtíð Kane, sem hefur skorað 21 mark í ensku úrvalsdeildinni með Tottenham á tímabilinu, er í mikilli óvissu. Hann hefur oft verið orðaður frá félaginu undanfarin ár en aldrei hefur hann virst vera nær því en nú. Hann þráir að vinna stóra titla. Það er eitthvað sem Man City ætti að geta boðið honum.
Haaland hefur verið magnaður á tímabilinu og skorað 39 mörk í öllum keppnum fyrir Dortmund. Hann mun líklega fá mörg tilboð í sumar.
Ásamt þessum tveimur risabitum þá er einnig talið að Martinez, hjá Inter og Silva, hjá Frankfurt, séu á blaði hjá Guardiola.
