Tveir leikir fóru fram í Lengjudeild karla í kvöld. Grinvíkingar höfðu betur gegn ÍBV og Grótta vann Þór í markaleik.
Öruggt hjá Grindvíkingum
Grindavík komst yfir strax á 7. mínútu leiksins gegn ÍBV á heimavelli sínum. Þar var að verki Sigurður Bjartur Hallsson. Markið skoraði hann úr skemmtilegri bakfallsspyrnu. Heimamenn tvöfölduðu forskot sitt 20 mínútum síðar. Þá skoraði Sigurjón Rúnarsson eftir flotta fyrirgjöf frá Aroni Jóhannssyni.
Staðan í hálfleik var 2-0 fyrir Grindvíkinga.
Eyjamönnum tókst ekki að koma sér inn í leikinn í seinni hálfleik. Guðberg Hauksson gerði út um leikinn með skallamarki. Sito tókst að klóra í bakkann fyrir ÍBV þegar um stundarfjórðungur lifði leiks með marki eftir fyrirgjöf Felix Arnar Friðrikssonar.
Nær komust gestirnir ekki. Flott byrjun Sigurbjörns Hreiðarssonar og hans manna í Lengjudeildinni í ár.
Sjö mörk og þrenna er Grótta vann Þór
Grótta lenti undir gegn Þór á heimavelli. Liban Abdulahi skoraði þá úr aukaspyrnu. Pétur Theódór jafnaði fyrir heimamenn eftir rúman hálftíma leik með marki úr vítaspyrnu.
Staðan í hálfleik var jöfn.
Eftir rúmar tíu mínútur í seinni hálfleik kom Ólafur Aron Pétursson Akureyringum aftur yfir. Forystan lifði þó ekki lengi því Pétur Theódór skoraði aftur fimm mínútum síðar með skalla eftir hornspyrnu. Títtnefndur Pétur fullkomnaði svo þrennu sína aðeins nokkrum mínútum síðar og kom Gróttu yfir. Heimamenn fengu annað víti þegar tæpar 20 mínútur lifðu leiks. Pétur fékk þó ekki tækifæri til að skora fjórða mark sitt. Sölvi Björnsson tók vítið og skoraði. Nokkrum mínútum síðar hleyptu Þórsarar lífi í leikinn að nýju þegar Ólafur Aron skoraði sitt annað mark. Gestirnir áttu þó eftir að missa Petar Planic af velli með rautt spjald.
Þór komst ekki nær í kvöld og 4-3 sigur Gróttu staðreynd.
