Chelsea tók á móti Real Madrid í seinni leik liðanna í undanúrslitum Meistaradeildar Evrópu. Fyrri leik liðanna lauk með 1-1 jafntefli og Chelsea vann í kvöld 2-0 sigur og er því komið áfram í úrslitaleikinn með samanlögðum 3-1 sigri úr einvíginu. Leikur kvöldsins fór fram á Stamford Bridge í Lundúnum.
Fyrsta mark leiksins leit dagsins ljós á 28. mínútu, það skoraði Timo Werner eftir stoðsendingu frá Kai Havertz.
Það var síðan miðjumaðurinn Mason Mount, sem innsiglaði 2-0 sigur Chelsea og sæti í úrslitaleiknum með marki á 85. mínútu eftir stoðsendingu frá Christian Pulisic.
Fleiri mörk voru ekki skoruð og Chelsea er þar með komið áfram í úrslitaleik Meistaradeildar Evrópu þar sem liðið mun mæta Manchester City.
Chelsea 2 – 0 Real Madrid
1-0 Timo Werner (’28)
2-0 Mason Mount (’85)
