Real Madrid vann 2-0 sigur á Osasuna í La Liga í kvöld. Sigurinn var mjög mikilvægur í toppbaráttunni.
Heimamenn í Real komu boltanum ekki í markið í fyrri hálfleik. Sergio Herrera, markvörður Osasuna var í miklu stuði.
Stuðningsmenn Madrídarliðsins þurftu að bíða þar til stundarfjórðungur lifði leiks eftir marki. Þá skoraði varnarmaðurinn Eder Militao eftir hornspyrnu sem tekin var af Isco.
Casemiro kláraði svo leikinn fyrir Real eftir stoðsendingu frá Karim Benzema.
Real Madrid er nú með 74 stig í öðru sæti deildarinnar, 2 stigum á eftir Atletico Madrid. Barcelona er svo í þriðja sæti með 71 stig og Sevilla í því fjórða með 70. Bæði Barca og Sevilla eiga eftir að leika fimm leiki en Madrídarliðin aðeins fjóra.