Allir knattleikir á Íslandi verða leyfðir frá og með 25 maí, þetta kom fram í máli Þórólfs Guðnasonar sóttvarnalæknis í dag.

Æfingar fullorðna verða frá þeim tímapunkti ekki með neinum takmörkunum. Á mánudag mátti hefja æfingar með sjö í hóp.

Stefnt er að því að deildirnar hér heima fari af stað í kringum 13 júní en nú geta félögin skipulagt æfingaleiki fyrir mót.

Þórólfur sagði að góður árangur yrði til þess að aflétting á samkomubanni yrði hraðari en gert var ráð fyrir. Ekkert smit hefur greinst á Íslandi síðustu þrjá daga.

Líklega verður samkomubannið miðað við 100 manns og því verða fáir áhorfendur í stúkunni til að byrja með.