Heimir Hallgrímsson þjálfari Al-Arabi fer með lærisveina sína í bikarúrslitaleik í Katar. Liðið mætir þá besta liðinu þar í landi, Al-Sadd.

Erfiðlega hefur gengið hjá Heimi og lærisveinum hans í deildinni og kjaftasögur verið á kreiki um að starf hans sé í hættu.

Aron Einar Gunnarsson leikur með Al-Arabi en Heimir hefur starfað í Katar í tvö ár, fáir þjálfarar endast svo lengi í starfi þar í landi.

Mitch Freeley hjá beIN SPORTS segir í samtali við Fótbolta.net að háværar sögusagnir séu í gangi um að starf þjálfarans sé í hættu.

„Það lítur þó út fyrir að Heimir sé hérna fyrir verkefnið og hugmyndafræðina, ég er viss um það eftir að hafa rætt við hann fyrr í vikunni. Það er hávær orðrómur um að hann gæti verið rekinn en ég persónulega sé það ekki gerast,“ sagði Freeley við Fótbolta.net.

Heimir Hallgrímsson gerði frábæra hluti með íslenska landsliðið áður en hann hélt til Katar en áður hafði hann þjálfað ÍBV hér á landi.