Lífið hjá Mason Greenwood framherja Manchester United og enska landsliðsins gengur ekki vel fyrir sig þessa dagana. Eftir einnar nætur gaman og brot á sóttvarnarreglum í Reykjavík hefur Greenwood einnig komið sér í klípu hjá félagsliði sínu.

Greenwood og samlandi hans Phil Foden komust í heimsfréttirnar eftir að þeir buðu tveimur íslenskum stúlkum á hótel sitt í september og brutu þar sóttvarnarreglur. Þeir voru reknir úr landsliðinu vegna þess og voru ekki valdir nú í október þegar enska landsliðið kom saman aftur.

Greenwood hefur svo ekki fundið taktinn með Manchester United í upphafi tímabils og hefur ekki verið í leikmannahóp liðsins í sigrum gegn Newcastle og svo PSG í gær.

Ole Gunnar Solskjær stjóri Manchester United hefur sagt að Greenwood sé lítillega meiddur en ef marka má ensk blöð er eitthvað meira á bak við fjarveru hans.

Þannig segir The Times að Greenwood hafi verið tekinn á teppið á dögunum, hann er sagður mæta ítrekað of seint til æfinga. The Times segir að Greenwood hafi verið kallaður til fundar og varaður við því að hinn yrði að fara að haga sér betur en þessi ungi sóknarmaður var frábær á síðustu leiktíð.

Enski boltinn á 433 er í boði