Rúnar Alex Rúnarsson er væntanlegur á æfingasvæði Arsenal í dag tli að ganga frá félagaskiptum sínum frá Dijon. Þetta herma heimildir 433.is.
Dijon og Arsenal hafa náð samkomulagi um kaupverðið en samkvæmt heimildum 433.is hækka laun Rúnars all verulega við skiptin.
Rúnar Alex mun skrifa undir fimm ára samning við Arsenal, fjögurra ára til að byrja með en með möguleika á fimmta árinu.
Ef allt gengur eftir í dag ætti Rúnar Alex að skrifa undir og vera í hóp hjá Arsenal gegn West Ham um helgina. Félagið seldi Emiliano Martinez í vikunni og á Rúnar Alex að taka hans stöðu.
Ensk blöð telja að Rúnar Alex gæti þreytt frumraun sína með Arsenal strax í næstu viku þegar Arsenal mætir Leicester í enska deildarbikarnum. Algengt er að varamarkvörður og menn sem spila minna byrji leiki í deildarbikarnum.
Árið 2014 fór Rúnar til danska liðsins Nordsjælland frá KR en þá var hann aðeins 18 ára gamall. Árið 2018 fór Rúnar frá danska liðinu og yfir til Frakklands í Dijon.
