Heimir Guðjónsson, þjálfari Vals, er spenntur fyrir helginni en nú er Pepsi Max-deild karla að fara af stað á ný eftir langa pásu.
Valur fær alvöru verkefni í fyrsta leik á morgun en þá fer fram grannaslagur við KR á Hlíðarenda.
Það eru flestir sérfræðingar sem spá Val titlinum og segir Heimir að það komi aðeins á óvart.
,,Ég átta mig ekki alveg á þessu ef ég á að vera hreinskilinn. Þú ert með lið eins og KR sem vann mótið tiltölulega auðveldlega á síðustu leiktíð – mótið var búið eftir 12 umferðir,“ sagði Heimir við 433.is.
,,Við erum teknir fram yfir þá, liðið sem endaði í sjötta sæti. Spá er bara spá og það þarf að spila leikina og að sjálfsögðu ætlum við að blanda okkur í toppbaráttu.“
,,Ég held að allir sem komi að klúbbnum, þeir eru staðráðnir í að gera betur en á síðustu leiktíð.“
Eins og gefur að skilja hefur undirbúningstímabilið verið skrítið og er deildin að fara af stað löngu seinna en áætlað var.
Heimir segir að leikmenn hafi þó náð að æfa ágætlega og hefur ekki miklar áhyggjur fyrir helgina.
,,Undirbúningstímabilið hefur verið skrítið. Maður hefur aldrei lent í þessu áður þannig að ég held að við höfum náð að komast ágætlega út úr þessu. Eftir að okkur var leyft að æfa allt liðið saman þá höfum við náð að æfa vel og spila ágætis æfingaleiki og svo er bara generalprufa um helgina.“
,,Það eru allir heilir nema Andri Adolphsson. Við vitum ekkert hvenær hann kemur til baka.“
Heimir er KR-ingur í húð og hár og var spurður út í þá ákvörðun að taka við grönnunum í Val.
,,Ég held að þetta sé flottur opnunarleikur. Það er alltaf rígur á milli Vals og KR, tvö góð lið. Ég held að þetta verði flottur fótboltaleikur.“
,,Auðvitað er þetta alltaf þannig að þú hefur ræpu til uppeldisklúbbsins en Willum Þór Þórsson er sennilega mesti KR-ingur sem sögur fara af og hann þjálfaði Val í fjögur ár þannig þú ert bara ráðinn í vinnu og reynir að gera hana eins vel og þú getur.“
Að lokum tjáði Heimir sig um bakvörðinn Magnus Egilsson sem kom með honum frá HB í Færeyjum. Sumir segja að Magnus sé ekki nógu góður fyrir Val en Heimir er ósammála því.
,,Það tekur menn auðvitað tíma þegar þeir koma í nýtt lið og nýtt land. Hann hefur verið að bæta sig hægt og bítandi. Ég hef ekki miklar áhyggjur af honum.“
