Nýjar reglur um samkomubann tóku gildi í dag og nú eru íþróttaæfingar utan dyra leyfðar, í meistaraflokki geta sjö leikmenn verið saman í hóp. Síðustu vikur hafa allar æfingar verið bannaðar.
Nokkuð hefur verið um ábendingar þess efnis að félög hafi ekki virt þessar reglur á meðan æfingar voru bannaðar. Þannig herma heimildir 433.is að alla veganna eitt félag í efstu deild karla í knattspyrnu hafi fengið aðvörun frá Almannavörnum, fyrir að brjóta þessar reglur á meðan samkomubannið var í gangi.
Um helgina birtist svo frétt á Stöð2 þar sem leikmenn Vals voru mættir til æfingar, fimm leikmenn voru mættir í hlaupapróf ásamt Srdjan Tufegdzic aðstoðarþjálfara liðsins. Skipulögð æfing er skýrt brot á reglunum sem voru í gildi.
Brutu Valsmenn reglur sóttvarnalæknis um æfingabann í fréttum stöðvar 2 i gær? Höfðinginn mætir með skýrslu frá Hlíðarenda í helgaruppgjöri Dr. Football. Drop um hádegi. pic.twitter.com/Ibbg1EmWSw
— Hjörvar Hafliðason (@hjorvarhaflida) May 4, 2020
Verið var að mæla hlaupatölur leikmanna Vals. ,,Allt íþróttastarf barna og fullorðinna er bannað,“ sagði á vef Almannavarna en þessar reglur voru í gildi þangað til í dag.
Reglan um tvo metrana var í gildi ef marka má myndefnið frá Stöð2 en í dag geta æfingar hafist að nýju með nokkuð eðlilegum hætti. Þannig geta sjö leikmenn verið á sama svæði og alls 28 leikmenn á heilum velli, en skipta þarf vellinum upp í fjögur svæði.