Fylkir tilkynnti í dag þjálfarateymi sitt fyrir komandi leiktíð, Ólafur Stígsson og Atli Sveinn Þórarinsson stýra skútunni. Ólafur Ingi Skúlason verður svo þeirra aðstoðarmaður í Pepsi Max-deildinni.
Ólafur Ingi mun halda áfram að spila en hann hefur reynst Fylki afar vel frá því að hann snéri heim úr atvinnumennsku um mitt sumar, árið 2018.
,,Það er spennandi að fá þann titil að vera þjálfari, þetta er mjög spennandi. Atli Sveinn og Óli Stígs reyndir þjálfarar, þrátt fyrir að hafa ekki stýrt liði í efstu deild. Báðir hafa þeir þjálfað í lengri tíma, mér skilst að þetta hafi verið skoðað fram og til baka af stjórninni. Öllum steinum var velt, þetta var það sem stjórninni fannst mest spennandi,“ sagði Ólafur Ingi þegar við ræddum við hann í dag.
Ólafur Ingi mun vinna náið með yngri flokkum félagsins og vinna í leikgreiningu.
,,Ég hugsa að fyrirkomulagið verði þannig, það að þeir séu tveir saman, þá mæðir minna á þeim á æfingasvæðinu. Þeir geta skipt með sér hutverkum og ég verið meira í skipulagsvinnu og leikgreiningu. Geri það á daginn og tekið tenginguna við yngri flokkana, fylgst með ungum spennandi leikmönnum. Það er þáttur í þessari rullu, hafa meiri tengingu. Svo klukkan 15:00 lokar maður þjálfarabókinni og gerist leikmaður.“
,,Það þarf að vinna þetta betur saman, að þeir hlutir sem við gerum í meistaraflokki skili sér niður. Að við séum að vinna þetta í sameiningu, skapa einkenni fyrir félagið. Að þeir leikmenn sem séu að æfa hérna hjá okkur, séu tilbúnir og lengra komnir þegar þeir eiga að taka skrefið í meistaraflokki.“
Ólafur Ingi hafði áhuga að leggja skóna á hilluna en finnst þetta of gaman til að hætta, 36 ára gamall.
,,Fyrir þetta tímabil þá var ég búinn að ákveða það hjá mér að þetta væri líklega síðasta tímabilið, svo fannst mér þetta ganga vel fyrir sig. Ég var heill og hafði gríðarlega gaman af þessu, enn þá andlega ferskur. Ég hugsaði með mér að myndi sjá eftir því að taka ekki annað tímabil, það eru forréttindi að fá að spila fótbolta í efstu deild. Maður vill lengja í því eins og hægt er.“