Íslenska karlalandsliðið vann öruggan heimasigur í undankeppni EM í kvöld er spilað var við Andorra. Fyrir leikinn var búist við þægilegum sigri Íslands en Andorra er alls ekki með frábært fótboltalið.
Fyrra mark leiksins skoraði Arnór Sigurðsson fyrir Ísland en hann kom boltanum í netið af stuttu færi á 38. mínútu. Staðan var svo orðin 2-0 á 65. mínútu er Kolbeinn Sigþórsson skoraði sitt 26. landsliðsmark.
Kolbeinn kláraði færi sitt af stakri snilld innan teigs og er búinn að jafna markamet Eiðs Smára Guðjohnsen. Gylfi Þór Sigurðsson gat bætt við þriðja marki Íslands á 73. mínútu en hann klikkaði þá á vítapunktinum.
Lokastaðan 2-0 fyrir Íslandi sem er enn í þriðja sæti riðilsins með 15 stig. Vonir Íslands um að komast beint á EM eru hins vegar nánast úti eftir jafntefli Frakklands og Tyrklands á sama tíma.
Tyrkland má tapa gegn Íslandi í nóvember en dugar að vinna þetta slaka Andorra lið í síðasta leik til að komast áfram.
Ísland þarf því líklegt að treysta á að komast á EM í gegnum umspil í Þjóðadeildinni en leikið er þann 26. og 31. mars.
Plús og mínus er hér að neðan.
Plús:
Kolbeinn Sigþórsson, hvað er hægt að segja? 26 mörk í 54 landsleikjum og búinn að jafna markamet Eiðs Smára Guðjohnsen. Magnaður framherji fyrir íslenska landsliðið, líklega sá besti í sögunni.
Það er jákvætt fyrir Arnór Sigurðsson að komast á blað í íslenska landsliðinu, íslenska liðinu vantar fleiri mörk af miðsvæðinu.
Það eru gleðitíðindi fyrir íslenska landsliðið að sjá Kolbein Sigþórsson byrja tvo leiki með svo stuttu millibili, Kolbeinn hefur á þessu ári verið að byggja líkama sinn upp eftir erfiða tíma. Gott skref í áttina, að komast aftur í fremstu röð fyrir hann.
Mínus:
Þó að Arnór Sigurðsson hafi skorað þá átti hann og Arnór Ingvi ekkert sérstakan leik á köntunum, eiga báðir mikið inni með landsliðinu. Ef horft er í hvernig þeir spila með félagsliði.
Frammistaða liðsins lengst af var ekki góð, gegn jafn slökum andstæðingi á heimavelli á að ganga frá honum.
Draumurinn um að fara beint inn á EM er nánast á enda eftir jafntefli Tyrkja við Frakkland. Þannig dugar Tyrkjum að vinna Andorra, liðið má tapa fyrir Íslandi í síðustu tveimur leikjum sínum. Ísland þarf því líklega að treysta á umspilið í mars.