Rio Ferdinand, sérfræðingur BT Sport ráðleggur Harry Kane að fara frá Tottenham, hafi hann áhuga á að vinna titla á ferli sínum.

Kane hefur gert frábæra hluti fyrir Tottenham en félagið virðist ekki færast nær því, að vinna stóra titla.

7-2 tap gegn FC Bayern í gær var erfiður biti að kyngja. ,,Af hverju ertu í leiknum? Til að vera goðsögn hjá einu félagi eða vinna titla? Er Tottenham líklegt til þess að vinna eitthvað?,“ sagði Ferdinand.

,,Það held ég ekki, þeir voru betra lið fyrir nokkrum árum. Ég var í Leeds og var að komast í undanúrslit Meistaradeildarinnar, vann deildina næstum því. Ég taldi möguleika mína betri hjá Manchester United, ég vildi fara og vinna titla.“

,,Harry Kane er pottþétt að hugsa það sama, hann þarf að svara þeim fljótt. Hann er 26 ára og það er lítill gluggi eftir, svona möguleikar koma og fara hratt.“

Peter Crouch var einnig hjá BT Sport í gær. ,,Hann vill vinna titla, Tottenham er ekki þar núna. Hann vill fá leikmenn inn og tryggingu um eitthvað, annars fer hann.“