Nuno Espírito Santo, knattspyrnustjóri West Ham, viðurkenndi eftir 3-1 tap gegn Newcastle að staða liðsins í fallbaráttunni væri orðin afar erfið.

West Ham lenti snemma undir á St James’ Park og Nuno breytti leikkerfi sínu eftir aðeins 25 mínútur þegar liðið var þegar komið tveimur mörkum undir. Tapið þýðir að Tottenham þarf nú aðeins eitt stig til viðbótar til að tryggja sæti sitt í ensku úrvalsdeildinni og ýta West Ham nær falli.

„Í dag misstum við af stóru tækifæri og við verðum að horfast í augu við að það verður gríðarlega erfitt að halda okkur uppi núna,“ sagði Nuno eftir leikinn.

Hann sagði einnig að West Ham hefði ekki lengur stjórn á eigin örlögum og þyrfti nú að treysta á úrslit annarra liða.

Nuno var sérstaklega ósáttur við einstaklingsmistök leikmanna sinna sem leiddu til marka Newcastle.

„Þetta er leikur mistaka og við verðum að axla ábyrgð. Það særir að gefa mörk svona auðveldlega. Andstæðingar okkar eiga að þurfa að hafa mikið meira fyrir mörkum sínum,“ sagði Portúgalinn.

West Ham er nú í mjög erfiðri stöðu í botnbaráttunni og gæti fall félagsins jafnvel ráðist strax á þriðjudag ef Tottenham nær í stig gegn Chelsea.