Þótt lögregla og saksóknari hafi unnið skjótt og vel að því að upplýsa sekt aðstoðarmanns innanríkisráðherra, í svonefndu lekamáli fer því fjarri að lögregla sé jafn dugleg að upplýsa um önnur lekamál.
Eitt af þeim snýr að Samkeppniseftirlitinu og umfjöllun Kastljóssins um meint brot Samskipa og Eimskips. Sá leki var kærður fyrir heilum fjórum árum og rannsakaður æ síðan, en ekkert hefur enn komið út úr því þótt starfsmaður Ríkisútvarpsins hafi upplýst í yfirheyrslum um þann innan Samkeppniseftirlitsins sem iðulega hefur látið fréttamönnum viðkvæm gögn í té í gegnum tíðina.
Á endanum tilkynnti lögreglan á höfuðborgarsvæðinu Ríkissaksóknara að rannsókn málsins væri lokið án niðurstöðu. Sendi ríkissaksóknari lögreglu nýverið bréf og fór fram á frekari rannsókn, en enn á ný hefur lögreglan lýst því yfir að frekari rannsókn þjóni engum tilgangi.
Hermt er að starfsmaður Samkeppniseftirlitsins hafi verið látinn fara vegna málsins. Í kjölfarið lýsti forstjóri eftirlitsins því yfir að enginn núverandi starfsmanna hefði réttarstöðu sakbornings. Um tíma var þó háttsettur starfsmaður eftirlitsins einnig með réttarstöðu sakbornings.
Á sama tíma og allt þetta gengur á, verður að teljast óheppilegt að Samkeppniseftirlitið hafi hvítþvegið RÚV af ásökunum um samkeppnisbrot auglýsingadeildar eftir sannkallaða skyndiskoðun.
En í þessu lekamáli er staðan sú að lögreglan telur sig ekki geta fundið hinn seka og spurning er hvort Ríkissaksóknari sættir sig við það?