Eiður Smári Guðjohnsen sá leik Liverpool og Napoli í Meistaradeildinni í kvöld en leikið var á Anfield.
Alisson Becker kom Liverpool til bjargar á lokasekúndum leiksins er hann varði skot Arkadiusz Milik sem var kominn í dauðafæri.
Napoli hefði dugað eitt mark til að komast áfram en Liverpool hafði að lokum betur 1-0.
Eiður líkti þeirri stund við dramatíkina árið 2005 er Liverpool fagnaði sigri í Meistaradeildinni eftir ótrúlega endurkomu gegn AC Milan.
,,Arkadiusz Milik. Þetta var 2018 útgáfan af atvikinu 2005 þó að við séum ekki komin eins langt í mótinu,“ sagði Eiður.
,,Eitt tækifæri, ein sekúnda, það var allt undir og Alisson Becker bjargaði enn einum leiknum með því að kasta sér fyrir skot Milik og ná að verja.“
,,Akkúrat þarna þá sannaði hann það, og ekki í fyrsta skiptið, af hverju hann var um stund dýrasti markvörður heims.“
,,Þeir rauðu eru komnir í 16-liða úrslit þökk sé honum.“
