Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er Þorvaldur Örlygsson þjálfari U19 ára landsliðs karla.

Þorvaldur hefur átt áhugaverðan feril, fyrst sem leikmaður og þjálfari.

Þorvaldur fékk skemmtileg tilboð á sínum tíma og gat gengið í raðir skoska stórliðsins Celtic.

Lou Macari hafði yfirgefið Stoke og tekið við Celtic og hafði áhuga á að fá Þorvald með sér til Skotlands.

Celtic er gríðarlega stórt félag eins og flestir vita og tala margir um að Celtic Park sé besti heimavöllur Evrópu.

Þorvaldur hafði ekki mikinn áhuga á því og var áfram hjá Stoke. Ári seinna var Macari mættur aftur á Britannia og þá ákvað Þorvaldur að kveðja.

,,Þetta voru tvö ár hjá Stoke og Lou Macari fór svo til Celtic. Joe Jordan tekur svo við,“ sagði Þorvaldur.

,,Lou Macari bauð mér að koma til Celtic og það voru viðræður um það en ég hafði ekki áhuga.“

,,Joe Jordan kom inn og hann var frábær þjálfari og náungi. Hann var svakalega skipulagður og það var gaman að vera með honum á æfingum og allt þetta.“

,,Úrslitin voru kannski ekki alveg eins góð. Hann náði ekki alveg til fólksins í Stoke eins og Lou Macari og það fór aðeins að snúast á móti honum.“

,,Það gekk ekkert hjá Lou Macari hjá Celtic sem kemur svosem ekkert á óvart. Hann var fljótlega kominn aftur til Stoke. Hann kemur til baka og tekur við aftur. Þá var kominn tími á að breyta til.“

,,Celtic er risastórt félag en ákvarðanirnar eru ekki alltaf teknar á fótboltavellinum, stundum fyrir utan.“