Ísland mun spila við Albaníu í undankeppni EM 2020 en sú keppni hefst í mars á næsta ári.
Ísland og Albanía áttust við í undankeppni EM fyrir sex árum og ræddi Aron við Fótbolta.net fyrir viðureignina.
Aron átti að lokum mjög góðan leik gegn Albaníu en Ísland vann 2-1 sigur í mikilvægum leik.
Lanbdsliðsfyrirliðinn var ekki of hrifinn af landinu til að byrja með og hafði þetta að segja á sínum tíma:
,,Já því miður segi ég nú bara. Þetta er ekki eitthvað sem er upp á marga fiska, þessi þjóð,“ svaraði Aron við Fótbolta.net.
,,Þetta er náttúrulega bara upplifelsi og maðut getur allavega sagt að maður hafi komið hingað og farið í klippingu.“
,,Það eru ekki margir sem geta sagt það. Það er gaman að fá að sjá eitthvað nýtt. Þetta verður bara fínt.“
Það eru ummælin sem fylgdu sem þóttu ekki ásættanleg er Aron talaði um almenna borgarann í Albaníu.
Aron talaði um að það væru mestmegnis glæpamenn í landinu, eitthvað sem vakti hörð viðbrögð.
,,Þetta er allt annað. Ég meina, það er mikil fátækt í þessu landi og þetta eru mestmegnis glæpamenn.“
,,Nei, nei. Þetta er fínt. Við erum búnir að hanga upp á hóteli og vera hér í smá tíma en hótelið er fínt, það er jákvætt.“
,,Við erum búnir að slappa mikið af og vonandi náum við að mæta í leikinn orkumiklir og flottir.“
,,Ég var skíthræddur þegar við lentum og erum í rútunni og mætum manni sem er ber að ofan, grjótharður með haglabyssu á bakinu og skotvesti á öxlinni.“
,,Manni var ekki alveg sama. Þetta var það fyrsta sem við sáum þegar við lentum, þetta er ekki alveg það sem maður vill sjá.“
,,Menn eru að tala í viðtali hérna hinum megin og menn eru eitthvað að drulla yfir mann eins og vanalega. Þetta er bara upplifelsi og maður tekur þetta í reynslubankann.“
Okkar maður var þó ekki lengi að biðjast afsökunar á ummælunum og sá strax eftir því sem hann sagði.
„Sem fyrirliði landsliðsins að kalla heila þjóð mestmegnis glæpamenn var skandall. Ég gerði mér grein fyrir því strax,“ sagði Aron til að mynda í þættinum Atvinnumennirnir okkar.
Aron hefur nánast verið til fyrirmyndar allan sinn feril og lærði að sjálfsögðu af þessum mistökum.
