Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Gestur þáttarins í þessari viku er Tryggvi Guðmundsson, fimmfaldur Íslandsmeistari og markahæsti leikmaður í sögu efstu deildar á Íslandi. Tryggvi átti magnaðan feril, hann var óþolandi leikmaður að mæta. Skoraði mikið og vann titla.

Tryggvi spilaði með Örgryte í Svíþjóð árið 2004 en upplifði ekki bestu tíma ferilsins hjá félaginu.

Tryggvi fékk um tíma lítið að spila en hann náði ekki vel saman við þjálfara liðsins sem vildi aldrei taka neina ábyrgð á slæmu gengi.

Okkar maður lét í sér heyra á æfingasvæðinu, eitthvað sem Jukka Ikäläinen, þáverandi þjálfari liðsins, tók ekki vel í og henti Tryggva úr liðinu.

Sagan endar þó vel en Tryggvi reyndist hetja Örgryte í umspilsleik er þrjóskur þjálfari ákvað að kyngja stoltinu.

,,Það var eiginlega pínu leiðinlegt. Ég er jákvæður maður að eðlisfari og það var mjög gaman að spila með Örgryte og búa í Gautaborg,“ sagði Tryggvi um tímann hjá Örgryte.

,,Þjálfarinn var að mínu mati asni, þannig ég segi það beint út. Hann tók aldrei ábyrgð.“

,,Við byrjuðum ágætlega og svo byrjaði allt að detta niður. Hann sagði: ‘Þetta hlýtur að fara að breytast.’ Án þess að hann myndi breyta því sjálfur á æfngasvæðinu.“

,,Æfingarnar breyttust ekkert og það var ekkert talað um þetta. Ég lét í mér heyra eins og ég er kannski þekktur fyrir.“

,,Það endaði með því að ég og hann urðum óvinir. Stundum var ég ekki í hóp en svo endaði ég á að vera hetja liðsins sem er fyndið.“

,,Við fórum í umspilsleik gegn Brommapojkarna og fyrri leikurinn fór fram þar í Stokkhólmi og tapaðist 2-1 og ég var ekki í hóp.“

,,Svo var seinni leikurinn hjá okkur og aðstoðarþjálfarinn sagði einmitt við þennan blessaða þjálfara vin minn að hætta þessari þrjósku og leyfa Tryggva að spila.“

,,Hann leyfði mér að spila og við unnum 1-0 og ég skoraði á 89. mínútu svo við unnum á marki á útivelli. Ég var eiginlega bara kominn með hugann til Íslands þarna.“