Íslenska karlalandsliðið spilaði hræðilegan leik í dag er liðið mætti Sviss í Þjóðadeildinni.

Íslensku strákarnir voru að spila sinn fyrsta leik síðan á HM í Rússlandi í sumar þar sem frammistaðan var í lagi.

Erik Hamren tók við keflinu af Heimi Hallgrímssyni eftir mótið og er óhætt að segja að hann byrji hörmulega.

Sviss burstaði Ísland 6-0 í dag og var ekki einn leikmaður sem náði sér almennilega á strik.

Hér má sjá einkunnirnar úr leiknum.

Hannes Þór Halldórsson 3
Alls ekki besti landsleikur Hannesar sem leit ekki sannfærandi út.

Birkir Már Sævarsson 3
Bauð upp á afskaplega lítið sóknarlega en var þó ekki slakasti maður vallarins.

Guðlaugur Victor Pálsson 2
Var í miklu basli og þá sérstaklega í fyrri hálfleik. Virkaði stressaður og gerði mistök.

Sverrir Ingi Ingason 3
Það var búist við miklu af Sverri Inga og Ragnari Sigurðssyni í dag en þeir leika saman í vörn Rostov. Þeir voru ekki á sömu blaðsíðu í dag.

Ragnar Sigurðsson 3
Sama og með Sverri. Þeir gáfu leikmönnum Sviss alltof mikinn tíma og virkuðu hálf ringlaðir. Bara skelfilegt heilt yfir.

Birkir Bjarnason 3
Ísland bauð nánast ekki upp á neitt sóknarlega og var Birkir týndur eins og aðrir leikmenn liðsins, baráttan ekki til staðar eins og oft áður.

Gylfi Þór Sigurðsson 4
Gylfi átti tvær fínar aukaspyrnur í fyrri hálfleik en það var ekki mikið meira en það. Okkar líflegasti maður í fyrri hálfleik þrátt fyrir það.

Björn Bergmann Sigurðarson 2
Það er vont að þurfa að nota orðið ‘hræðilegt’ en Björn gerði ekkert og virtist ekki hafa neinn áhuga á þessu.

Rúrik Gíslason 3
Bauð ekki upp á neitt. Fékk tækifærið í dag en það var svo sannarlega ekki nýtt.

Jón Daði Böðvarsson 3
Það var enginn sem stóð upp úr í dag og ekki var það Jón Daði. Fékk lítið í hendurnar.

Ari Freyr Skúlason 2
Var í miklu, miklu basli með Xherdan Shaqiri í dag. Virkilega erfiður dagur fyrir Ara.

Varamenn:
Theodór Elmar Bjarnason 4
Viðar Örn Kjartansson 3