Hörður Snævar Jónsson skrifar frá Rússlandi:
Hannes Þór Halldórsson markvörður Íslands ætlar að reyna að leggja það til hliðar að hann hafi varið vítaspyrnu frá Lionel Messi í fyrsta leik Íslands á HM.
Markvörðurinn knái fór yfir málið fréttamannafundi í dag en ljóst er að augnabilið fer með Hannesi í gröfina.
Hannes segir leikdaginn gegn Argentínu hafa verið langt frá því að vera venjulegur dagur á skrifstofunni.
,,Þetta var allt annað en venjulegur dagur í vinnunni, þetta var auðvitað ótrúleg upplifun. Fyrsti leikur Íslands á HM, það eru allir stoltir að taka þátt í því,“ sagði Hannes.
,,Þetta var stórt augnablik, eitthvað sem maður gleymdir aldrei. Núna snýst þetta um að leggja þetta til hliðar, við heyrum nóg af þessu þegar við komum heim. Núna snýst þetta um einbeita sér að næsta leik.“
