Óhætt er að segja að erlendir knattspyrnuunnendur trúi ekki eigin augum þegar kemur að afrekum íslenska karlalandsliðsins í fótbolta. Það sama gildir ekki um ítalska háskólakennarann Gianguglielmo Lozato sem hefur verið í miklum samskiptum við blaðamann DV undanfarna viku. Tilefni þessara samskipta er myndband frá árinu 2013 þar sem Lozato lýsir því yfir að íslenska landsliðið sé ógnarsterkt og eigi sér bjarta framtíð. Fullyrðingar Lozato hafa vakið athygli annarra miðla og þar á meðal hafa tyrkneskir miðlar fjallað um Lozato í kjölfarið af slælegu gengi tyrkneska landsliðsins gegn okkar mönnum.
Lozato er hógværðin uppmáluð í spjalli við blaðamann DV en þess má geta að hann kom upplýsingum sjálfur á framfæri við blaðið. „Ég sá þetta allt fyrir árið 2013,“ segir hann og vísar í áðurnefnda umfjöllun. Hann segir að 4-4 jafntefli Íslands við Sviss hafi sannfært hann um gæði íslensku leikmannanna og bjarta framtíð liðsins. Árangurinn hingað til komi honum því ekki óvart.
Sýn Lozatos er skýr varðandi riðlakeppnina sem er fram undan hjá íslenska liðinu í Rússlandi. „Staðan verður 0-0 í hálfleik gegn Argentínu en svo munu Messi og félagar hans vinna leikinn,“ segir Lozato. Hann segir að íslenska þjóðin þurfi þó ekki að örvænta því sigrar gætu orðið staðreynd í hinum tveimur leikjunum. „[Alfreð] Finnbogason gæti skorað tvö mörk gegn Nígeríu og [Gylfi] Sigurðsson skorar gegn Króatíu,“ segir Lozato. Eftirlætisleikmaður hans er þó með sterk tengsl við Ítalíu. „Það er [Emil] Hallfreðsson. Hann er stórkostlegur en vanmetinn leikmaður,“ segir okkar maður.