Ólafur Karl Finsen reyndist hetja Vals í Pepsi-deild karla í kvöld er liðið vann 2-1 sigur á toppliði Breiðabliks.
Óli Kalli fékk sínar fyrstu mínútur í kvöld og skoraði sigurmark Vals aðeins þremur mínútum eftir að hafa komið inná.
Óli segir að tilfinningin að skora hafi verið góð og hófst svo ansi skemmtilegt viðtal við leikmanninn.
,,Tilfinningin var bara góð, við erum í mikilli brekku. Við erum í mikilli brekku. Bara brekkan,“ sagði Ólafur í byrjun viðtals sem vekur athygli.
,,Brekkan var mjög brött og er ennþá brattari núna. Það er gott að vera í brekku og okkur líður vel í brekku.“
,,Ég fór síðast í brekkuna í dalnum og var edrú, ég er enn að jafna mig. Það voru erfiðir 24 tímar.“
,,Ég er alveg pollrólegur. Ég er að reyna að koma mér í leikform. Ég er ekki í eins góðu leikformi og aðrir menn í liðinu. Ég er að vinna í mínum málum.“
,,Mér er alveg sama um mig, ég er ánægðastur með að hafa unnið leikinn.“
