Blikur eru á lofti í íslenskri ferðaþjónustu, sem kunnugt er, og hluthafar í Icelandair hafa ekki farið varhluta af mikilli taugaveiklun á markaðnum. Greiningar sýna, að markaðsvirði félagsins er komið langt undir upplausnarvirði þess og er óhætt að það sýni stöðuna í hnotskurn.

Á meðan margir spá því að bæði Úlfar Steindórsson stjórnarformaður og Björgólfur Jóhannsson forstjóri Icelandair þurfi að axla sín skinn fljótlega ef ekki verður gjörbreyting til hins betra, beinast augun að samkeppnisaðilanum WOW undir forystu Skúla Mogensen.

Greiningaraðilar linntu ekki látum fyrr en WOW gaf upp afkomutölur fyrir 2017 og þær reyndust verri en flesta hafði grunað. Margt bendir til þess að tapið hafi haldið áfram á þessu ári í takt við hækkandi eldsneytisverð og harðnandi verðsamkeppni.

Spurt er hversu mikið úthald Skúli hafi í komandi átök. Já eða bakhjarlar hans. Munu lánveitendur félagsins sækjast sjálfir eftir auknum áhrifum?

Icelandair og WOW eru nú sumpart komin í sömu stöðu og bankarnir fyrir efnahagshrunið 2008, að vera orðnir of stórir þátttakendur í íslensku efnahagslífi til að falla. Gríðarlegur fjöldi starfa treystir á að félögin flytji ferðamenn hingað til lands sem aldrei fyrr og efnahagur þjóðarinnar reiðir sig á gjaldeyristekjurnar sem félögin skapa.

Allra augu verða því á flugfélögunum komandi vikur og mánuði.