Flugvél hrapaði í íbúahverfi á suðurhluta Tenerife skömmu eftir flugtak frá Tenerife South flugvellinum síðdegis í gær.
Flugvélin, sem var í æfingaflugi, hrapaði niður í götu í íbúabverfi skammt frá golfvellinum Amarillo Golf. Reyndi flugmaður neyðarlendingu áður en vélin brotlenti.
Canarian Weekly greinir frá og ræðir við sjónarvott, Jasmine Knight, ferðamann frá Northampton á Englandi. Hún segist hafa verið á gangi niður götuna með eiginmanni sínum og mági þegar flugvélin kom niður og stefndi beint í áttina að þeim. „Við urðum að flýja undan vélinni þegar hún lenti á ljósastaur og tré, þannig að hún stöðvaðist áður en hún lenti á okkur. Mér finnst ömurlegt að hugsa til þess hvað hefði getað gerst.“
Engin meiðsl á fólki virðast hafa orðið í þessu flugslysi því sjónvarvotturinn og samferðamenn hennar hjálpuðu tveimur flugmönnum út úr brakinu og virtist þá ekki hafa sakað. Lögregla og fleiri viðbragðsaðilar komu skömmu síðar á vettvang. Staðfest er að ekki voru aðrir í flugvélinni en flugmennirnir tveir.
Skráningarnúmer flugvélarinnar er EC-NME, en hún er af gerðinni Reims-Cessna F172M Skyhawk.
Sjá nánar um málið hér.
Breski fjölmiðillinn The Sun hefur einnig fjallað um málið og birti myndband frá vettvangi:
