Huntley afplánar lífstíðardóm sem hann hlaut fyrir morðin á hinum 10 ára gömlu Holly Wells og Jessicu Chapman árið 2002. Var hann dæmdur til að afplána að minnsta kosti 40 ár en að þeim tíma liðnum átti hann að geta sótt um reynslulausn.
Heimildir Daily Mail herma að Huntley sé haldið sofandi í öndunarvél með alvarlega áverka á höfði. Ef hann lifir af – sem þykir ólíklegt – verði hann blindur og heilaskaddaður það sem eftir er.
Breskir fjölmiðlar greina frá því að ráðist hafi verið á Huntley með járnstöng á meðan hann var við vinnu í fangelsinu síðastliðinn föstudag. Maðurinn sem grunaður er um að hafa ráðist á hann heitir Anthony Russell og situr hann inni fyrir þrjú morð.
„Hann hefur ekki sýnt mikil batamerki frá því að hann var fluttur á sjúkrahúsið þrátt fyrir að læknar hafi gert sitt besta,“ segir heimildarmaður Daily Mail. „Þetta virðist bara vera spurning um tíma. Það gætu verið dagar, það gætu verið vikur. Það er líklega fyrir bestu, fáir munu syrgja hann,“ segir heimildarmaðurinn.
Morðin á Holly og Jessicu vöktu gríðarlega athygli á sínum tíma, en Huntley var húsvörður í skóla sem stúlkurnar voru í og lokkaði hann þær inn á heimili sitt þar sem hann myrti þær.
