Framkvæmdastjóri NATO kallar ekki allt ömmu sína, en hann kallaði þó Donald Trump „pabba“ á leiðtogafundi NATO í dag. Ummælin féllu á blaðamannafundi í Haag og hafa vakið mikla athygli.
Donald Trump Bandaríkjaforseti var mættur á blaðamannafund í dag og var þungt í honum hljóðið eftir að fjölmiðlar fjölluðu um frummat bandarísku leyniþjónustunnar á sprengjuárásum Bandaríkjanna á Íran. Samkvæmt frummatinu báru árásirnar ekki þann árangur sem að var stefnt. Trump er fyrir það fyrsta sármóðgaður að þessu mati hafi verið lekið í fjölmiðla og í öðru lagi er hann ósammála því og er sannfærður um að árásirnar hafi sett strik í kjarnorkuáætlanir Íran til lengri tíma.
Framkvæmdastjóri NATO, Mark Rutte, hefur tekið eftir því að Trump var ekki lukkulegur og því freistaði hann þess að drepa umræðuefninu á dreif. Rutte rifjaði upp að Trump hafi gengið ákveðið til verka í aðgerðunum til Íran og svo komið á vopnahlé. Þegar útlit var fyrir að Íran og Ísrael hafi ætlað að rjúfa vopnahléið hafi Trump svo ekki sparað stóru orðin og sagt löndunum til syndanna svo friðurinn hélst. Rutte komst svo að orði: „Pabbi þarf stundum að taka sterkt til orða“.
Rutte vakti líka athygli í gær fyrir skilaboð sem hann sendi Trump þegar forsetinn var á leiðinni á leiðtogafundinn, en þau voru svo smeðjuleg að það jaðraði við ástarjátningu.
