Israel Katz, varnarmálaráðherra Ísraels, segir að Ayatollah Ali Khameini, æðsti klerkur Írans og sá valdamesti þar í landi, geti ekki fengið að lifa lengur eftir árás Írana á sjúkrahús í borginni Be’er-Sheva í suðurhluta Ísraels í morgun.

Katz heldur því fram að Khameini hafi persónulega fyrirskipað umrædda árás með það markmið í huga að valda skaða á óbreyttum borgurum landsins.

„Hann hefur það markmið að eyða Ísraelsríki. Slíkur maður má ekki lengur fá að lifa,“ sagði Katz.

Vladimír Pútín Rússlandsforseti og Xi Jinping, forseti Kína, hafa kallað eftir því að diplómatísk lausn verði fundin til að leysa átökin milli Ísraels og Írans og má túlka það sem ákall til Donalds Trump Bandaríkjaforseta að blandast ekki inn í átökin eins og hann hefur ýjað að.