Vissir þú að súkkulaði getur verið lostavekjandi? Í því eru efni á borð við trýptófan, sem er eitt grunnefnanna í serótóníni sem tengist kynferðislegri örvun. Annað efni sem er í súkkulaði er phenylethylamine sem er örvandi efni, skylt amfetamíni, sem losnar úr læðingi þegar fólk verður ástfangið.

Niðurstöður rannsóknar sýna að neysla súkkulaðis getur aukið kynhvöt fólks og bætt frammistöðu karla í kynlífinu. Vísindamenn sprautuðu prótíni, sem er í súkkulaði, í karla og fengu þá síðan til að horfa á klám. Þetta hafði þau áhrif að þeir örvuðust meira við klámáhorfið en ef þeir fengu ekki prótín.

Það var prótínið kisspeptin sem vísindamenn hjá Imperial College London sprautuðu í mennina. Niðurstaða þeirra var að efnið breytir virkni ákveðinna heilastöðva sem eru taldar stýra kynhvötinni.

Fjallað var um málið á vef Science Daily. Alexander Comninos, aðalhöfundur rannsóknarinnar, sagði að niðurstöðurnar geti orðið til að opna fyrir notkun kisspeptin í framtíðinni gegn lítilli kynhvöt sem geti haft alvarlegar afleiðingar á sambönd fólks.

Það verður þó að taka niðurstöðunum með þeim fyrirvara að aðeins 29 manns tóku þátt í henni og því er ekki hægt að alhæfa um niðurstöðurnar. Stærri rannsókn þarf að koma til áður en hægt verður að fullyrða hvort þetta eigi við rök að styðjast.