Þremur mánuðum eftir að 74 ára vörubílstjóri endaði ofan í stórri holu, sem myndaðist skyndilega í götu nærri Tókýó í Japan, tókst leitarmönnum að finna lík hans og ná því upp.

Maðurinn ók þriggja tonna vörubíl þegar hola myndaðist skyndilega í götunni, sem hann ók eftir í Yashio. Bíllinn endaði ofan í holunni.

Björgunaraðgerðir hófust nær samstundis en aðeins tókst að ná palli vörubílsins upp. Ökumaðurinn sat fastur í stýrishúsinu. Síðan er talið að hann hafi sogast út úr því og enn dýpra niður.

Eftir mikinn undirbúning, til að tryggja öryggi leitarmanna, tókst þeim loks að finna líkið á föstudaginn og koma því upp á yfirborðið. Meðal þess sem þurfti að gera áður var að gera örugga leið neðanjarðar.

Sérfræðingar segja að holan hafi myndast vegna tæringar í holræsalögnum. Holrúm hafi myndast undir þeim og síðan hafi jarðvegurinn hrunið undan þunga ökutækja sem óku eftir götunni og holan myndast.