700 starfsmenn bandarísku skyndibitakeðjunnar McDonalds í Bretlandi hafa höfðað skaðabótamál gegn fyrirtækinu vegna atvika sem áttu sér stað eftir nóvember 2023. Stjórnendur eru sakaðir um að hafa spurt unglingsstarfsmenn hversu mörgum þeir hafi sofið hjá, snert ungt starfsfólk á óviðeigandi hátt á vöktum og „herjað á unga kvenkyns starfsmenn“.
Í júlí 2023 greindi breska ríkisútvarpið frá ásökunum um áreitni gegn ungu starfsfólki McDonalds í Bretlandi, en fyrirtækið er einn stærsti vinnuveitandi landsins með um 170 þúsund starfsmenn. Margir þeirra eru ungir og mörg ungmenni starfa hjá fyrirtækinu. Hvert útibú McDonald’s er rekið á sérleyfi, þannig að yfirmaður á hverjum stað ræður hvern hann ræður til vinnu.
Eins og áður sagði áttu atvikin sem starfsmennirnir 700 höfða sér stað eftir nóvember í fyrra og því má gera ráð fyrir að fleiri kærur vegna eldri atvika fylgi í kjölfarið.
The Sun er á meðal breska miðla sem fjallar um málið í dag og ræðir miðilinn við fyrrum starfsmenn McDonalds.
Kona sem vill ekki koma fram undir nafni og kallar sig Claire vann í útibúi í West Midlands þar til í maí 2023 þegar hún neyddist til að hætta vegna óþægilegrar hegðunar. Hún sagði við BBC að vaktstjórinn hennar hefði beðið hana um kynlíf gegn aukavöktum, sem hún neitaði.
Claire var 17 ára en yfirmaðurinn á þrítugsaldri.
„Þú býst ekki við svona framkomu. Þetta var algjörlega óviðeigandi,“ segir Claire. Segir hún að þegar hún hafi reynt að kvarta undan framgöngu yfirmannsins þá hafi henni verið sagt að gleyma þessu (e. Suck it up).
Tvítugur kvenkyns starfsmaður heldur því einnig fram að karlkyns yfirmaður í útibúi hennar í Austur-Englandi hafi sent henni nektarmyndir. Hún þurfti að hætta störfum í ágúst á síðasta ári.
Aðrar ásakanir eru meðal annars einelti sem 16 ára starfsmaður varð fyrir, segir hann að öskrað hafi verið á hann og hreytt í hann fúkyrðum, og 19 ára sstarfsmaður, sem var gert grín að, fyrir að glíma við námsörðugleika og vera með augnsjúkdóm. Báðir starfa þeir enn hjá McDonalds.
Ár er síðan yfirmaður McDonalds í Bretlandi, Alistair Macrow, lofaði að fara í umbætur á vinnuumhverfi og háttsemi starfsmanna keðjunnar í Bretlandi. Macrow kom fyrst fram fyrir viðskipta- og viðskiptanefnd breska þingsins í nóvember 2023 þar sem hann sagði þingmönnum að fyrirtækið væri að vinna að bættum kjörum starfsfólks eftir að vandamál komu í ljós.
Einn núverandi og tveir fyrrverandi starfsmenn keðjunnar segja í frétt The Sun að þær úttektir á veitingastöðunum sem lofað var, væri stýrt af útibúum keðjunnar. Og nú eru um 700 núverandi og fyrrverandi yngri starfsmenn að grípa til málshöfðunar gegn McDonald’s fyrir „að vernda þá ekki“.
Elliott, sem notar einnig dulnefni, hætti störfum í Suður-Englandi í febrúar 2024. Hann segir að ef hann ætti systur eða dóttur, myndi hann ekki vilja að þær ynnu á McDonald’s. Segir hann að á sama tíma og Macrow ávarpaði breska þingið og lofaði bættu vinnuumhverfi hafi framkvæmdastjóri verið færður til í starfi og sendur í útibú McDonalds sem Elliott starfaði í. Allt til að koma í veg fyrir að framkvæmdastjórinn þyrfti að svara fyrir hegðun sína, en hann er sakaður um að hafa sent kynferðislega gróf skilaboð til kvenkyns samstarfsmanna sem voru á aldrinum 16-18 ára.
Macrow mætti aftur fyrir breska þingið í dag þar sem hann ræddi málshöfðanirnar. Sagði hann 75 ásakanir um kynferðislega áreitni hafa verið sendar beint til McDonalds, af þeim hafi verið tekið á 47 þeirra með agaviðurlögum og 29 ásökunum hefði verið vísað frá.
„Þessar ásakanir sem lýst er eru viðurstyggilegar, óviðunandi og það er enginn staður fyrir þær á McDonald’s. Það er ekki pláss fyrir fólk sem hagar sér á þennan hátt í okkar starfsemi.
Þær ráðstafanir sem við grípum til gera það að verkum að við getum boðið upp á öruggan vinnustað þar sem virðing er borin fyrir fólki og fólk finnur að virðing er borin fyrir því.
Ég heyri frá okkar fólki að þetta er að virka.“
Shelby, sem hóf störf í útibúi í Berkshire árið 2022, þá 16 ára gömul, segir að kynferðisleg áreitni af hálfu samstarfsmanna væri algeng. „Þeir þreifuðu á manni um maga, mitti, rass. Á hverri vakt sem ég vann var að minnsta kosti ein athugasemd af kynferðislegum toga eða ég var snert með óviðeigandi hætti, hendi strokið yfir mig, eða það væri alvarlegri hlutur eins og að klipið í rassinn á mér, gripið um mjaðmirnar á mér og svoleiðis.“
Hún lýsti því hvernig vinnufélagi á fimmtugsaldri kom fyrir aftan hana við afgreiðsluborðið, greip um hana og þrýsti henni að nára hans. „Ég bara fraus – mér fannst þetta viðbjóður.“
Í yfirlýsingu frá talsmanni McDonald’s segir: „Að tryggja að 168.000 manns sem vinna á McDonald’s veitingastöðum séu öruggir er mikilvægasta ábyrgð bæði okkar og sérleyfishafa okkar, og við höfum tekið að okkur umfangsmikla vinnu á síðasta ári til að tryggja að við höfum leiðandi starfshætti í iðnaði í stað til að styðja þessa forgangsröðun. Öll atvik um misferli og áreitni eru óviðunandi og háð skjótri og ítarlegri rannsókn og aðgerðum.“
