Manneskjur þurfa svefn eins og þær þurfa fæðu, klæði og húsnæði. Það er þó ekki alltaf hlaupið að því að sofna. Svefninn kemur ekki bara því við viljum sofna. Það getur tekið allt að hálftíma að festa svefn og fyrir fólk sem þráir fátt meira en fleiri stundir í sólarhringinn getur hálftími bara verið alltof langur tími.
Eitt ráð gæti þó hjálpað fólki að sofna hraðar og það er leikandi létt að fara eftir því. Með því að skrifa niður verkefni komandi dags er mögulega hægt að friðþægja heilann svo hann treysti sér til að hleypa líkamanum í hvíld.
„Þegar ég fór að skrifa verkefnalista á hverju kvöldi datt mér ekki í hug að það myndi hjálpa mér með svefninn. Ég vildi bara finna betri leið til að fylgjast með forgangsröðun minni frá degi til dags,“ skrifaði Adam Benjamin, ritstjóri hjá CNET, í vikunni sem leið.
„Svo á hverju kvöldi, áður en ég fór í háttinn, skrifaði ég niður þrjú verkefni sem ég ætlaði að klára daginn eftir. Ég skráði líka niður eitt jákvætt sem gerðist yfir daginn, sama hversu lítilvægt það var.“
New York Post rekur að þetta sé engin vitleysa í ritstjóranum. Árið 2017 var gerð rannsókn sem sýndi að þátttakendur sem skrifuðu niður verkefni morgundagsins fyrir háttatíma áttu auðveldara með að sofna. Það tók þá að meðaltali níu mínútur í staðinn fyrir hálftíma. Rannsakendur töldu að þetta megi líklega rekja til þess að með því að skrifa verkefni morgundagsins niður með skipulegum hætti þá minnki áhyggjur sem þar af leiðandi geri fólki kleift að sofna.
Þetta er kallað á ensku cognitive offloading, eða hugræn afhleðsla. Þessi afhleðsla gerir fólki auðveldara að ljúka verkefnum og bæta frammistöðu. Dæmi um þetta er að skrifa niður innkaupalista, að setja áminningu á símann um verkefni og fundi og annað slíkt.
Önnur rannsókn fór fram í Þýskalandi árið 2014. Þátttakendur voru starfsmenn í upplýsingatækni. Þeir þátttakendur sem höfðu ekki lokið verkefnum sínum fyrir helgina áttu erfiðara með svefn því þeir eyddu svo miklum tíma í að hugsa um ókláruðu verkefnin.
CNN ræddi nýlega við sérfræðinga í svefni sem mæla með því að fólk bóki tíma fyrir áhyggjur og haldi áhyggjunum frá svefnherberginu. Þar með verður svefnherbergið að griðastað. Áhyggjutíminn getur svo verið nýttur í að skrifa verkefnalista. Svo þegar fólk er komið í bólið þá getur það sofnað laust við áhyggjur, enda liggur listinn góði þá fyrir og getur beðið til morguns.
