Árum saman hefur karlmönnum, sem vilja eignast börn, verið ráðlagt að hætta að ganga í þröngum nærbuxum og nota víðari í staðinn. Þetta var gert út frá þeirri hugmynd að hitinn sem myndast vegna þröngra nærbuxna skaði sæðisfrumurnar.

Vísindamenn við Harvard TH Chan School of Public Health rannsökuðu málið að sögn BBC og komust að þeirri niðurstöðu að þetta gamla ráð er hárrétt.. Þeir rannsökuðu 656 karlmenn og komust að þeirri niðurstöðu að þeir sem notuðu víðar nærbuxur, boxerbuxur, voru með 17 prósent fleiri sæðisfrumur og 33 prósent fleiri syndandi sæðisfrumur en þeir sem voru í þröngum nærbuxum.

Þátttakendurnir voru allir sjúklingar frjósemisstofu en fjöldi sæðisfrumna þeirra var innan eðlilegra marka. Í rannsókninni var tekið tillit til annarra þátta sem geta haft áhrif á sæðið, þar á meðal aldur, þyngd, reykingar og heit böð.

Vísindamennirnir komust einnig að þeirri niðurstöðu að karlar, sem notuðu víðar nærbuxur, voru með minna af ákveðnu hormóni í heilanum en þetta hormón segir eistunum að framleiða meira sæði. Talið er að þetta hormón sé aðferð líkamans til að bregðast við hitanum við eistun.

Á undanförnum 25 árum hafa gæði sæðis karla á vesturlöndum minnkað um 50-60 prósent. Vísindamenn segja að umhverfisáhrif séu hugsanlega ein orsök þess.