Bresk kona, hin 34 ára Jesmin Akter, var nýlega dæmd í tveggja ára skilorðsbundið fangelsi og til að sinna 150 klukkustunda samfélagsþjónustu fyrir að hafa orðið 11 ára dóttir nágranna síns að bana fyrir slysni. Þessi hræðilegi atburður átti sér stað þegar konan var að reyna að drepa veggjalýs í íbúð sinni.

BBC skýrir frá þessu og segir við dómsuppkvaðninguna hafi dómarinn sagt að hann skilji vel að konan sé þjökuð af sektarkennd og að það sé mjög ósennilegt að hún muni nokkru sinni gleyma að það sem gerðist var afleiðing þess sem hún gerði.

Akter hafði orðið sér úti um eiturefnið álfosfís frá Ítalíu. Hún hugðist nota það til að gera út af við veggjalýs sem höfðu tekið sér bólfestu í íbúð hennar í Shadwell í Lundúnum.

En hún las ekki leiðbeiningarnar með eitrinu áður en hún dreifði banvænum skammti af því um íbúðina. Að því loknu fór hún í fjölskylduferð í sólarhring.

Eitrið barst í gegnum veggina í íbúð nágrannanna. Þar komst efnið í snertingu við raka og þá myndaðist hið lífshættulega fosfíngas sem er litlaust, eldfimt, eitrað, ætandi og sprengifimt.

Fosfíngasið varð hinni 11 ára Fatiha Sabrin að bana á 11 ára afmælisdeginum hennar þann 11. desember 2021. Hún vaknaði snemma um morguninn og sagði móður sinni að sér væri illt í maganum. Hún kastaði einnig upp. Móðir hennar hringdi í neyðarlínuna og fékk þær ráðleggingar þar að gefa Fatiha lyf gegn niðurgangi.

Þegar leið á daginn byrjuðu aðrir íbúar í fjölbýlishúsinu að hósta.

Fatiha lést um klukkan 17.30.

Magn fosfíngass, sem barst inn í íbúð Fatiha, var allt að 26 sinnum meira en telst banvænt.

Magnið af álfosfís, sem Akter notaði, var þrisvar sinnum meira en framleiðandinn mælir með. Þess utan stóð á umbúðunum að efnið væri aðeins til notkunar í iðnaðarhúsnæði en ekki í íbúðarhúsnæði.