Um hlaup er að ræða sem á að sögn að geta komið í veg fyrir þynnku að eilífu. Samkvæmt frétt Express þá eru það vísindamenn við ETH Zürich í Sviss sem hafa þróað sérstakt prótínhlaup sem getur brotið alkóhól niður í meltingarkerfinu.
Í rannsókn þeirra, sem hefur verið birt í vísindaritinu Nature Nanotechnology, kemur fram að aðferðin hafi verið prófuð á músum og hafi hlaupið breytt alkóhóli í óskaðlega ediksýru á skjótan og áhrifaríkan hátt áður en það komst í blóðið.
Það er einmitt í blóðinu sem alkóhól veldur ölvunaráhrifum og tjóni.
„Hlaupið flytur niðurbrot alkóhólsins frá lifrinni yfir í meltingarveginn,“ sagði Raffaele Mezzenga, prófessor, að sögn Science Daily.
Vísindamennirnir segja að hægt verði að taka hlaupið áður en byrjað er að drekka eða eftir að áfengisneysla hefst. Það komi í veg fyrir að magn alkóhóls í blóði aukist.
Það sem gerir hlaupið öðruvísi en þær vörur, sem nú þegar eru til staðar og eru sagðar geta læknað þynnku, er að hlaupið vinnur einnig gegn orsök þynnkunnar, tekst ekki bara á við afleiðingarnar af drykkjunni.
Hlaupið virkar þó aðeins á meðan það er enn alkóhól í meltingarfærunum. Það gerir að verkum að það kemur að litlu gagni gegn áfengiseitrun og segja vísindamennirnir að það sé bara best að sleppa því að drekka áfengi og sleppa þannig alfarið við þynnku.
