Það sem nágrannar vissu aftur á móti ekki var að fullt nafn Danny var í raun og veru Daniel Andreas San Diego og hann var ofarlega á lista FBI yfir eftirlýsta hryðjuverkamenn.
Daniel var handtekinn á heimili sínu í Conwy-dalnum í Wales á mánudag eftir að hafa verið á flótta undan réttvísinni undanfarin tuttugu ár rúmlega.
Daniel þessi er grunaður um aðild að tveimur sprengjuárásum í San Francisco í Bandaríkjunum í ágúst 2003. Tvær sprengjur sprungu með skömmu millibili við tvö fyrirtæki í borginni en talið er að Daniel hafi framið árásirnar vegna gruns um að í fyrirtækjunum færu fram lyfjarannsóknir á dýrum. Engan sakaði í sprengjuárásunum en tjónið var umtalsvert og ljóst að illa hefði getað farið hefði fólk verið nálægt.
Daniel er sagður hafa fest kaup á einbýlishúsi, einskonar sveitasetri, í Wales í ágúst í fyrra. Nágrannar voru fáir og samskipti þeirra á milli ekki ýkja mikil.
„Hann virtist ekki vilja tala mikið þegar maður rakst á hann,“ segir nágranni hans í samtali við Mail Online í gær. „Þetta er afskekktur staður og maður myndi ekki átta sig á því að það væri hús þarna nema maður myndi ganga upp að því.“
Í frétt Mail Online kemur fram að lögregluyfirvöld í Wales, að beiðni FBI, hefðu ráðist til inngöngu á heimili hans í Wales og handtekið hann. Hann var fluttur til Lundúna þar sem framsalsbeiðni bandarískra stjórnvalda verður tekin fyrir.
Ekki liggur fyrir hvernig FBI fékk upplýsingar um dvalarstað hans en FBI hafði lagt 250 þúsund dollara verðlaunafé til höfuðs honum.
