Steve Craig Johnson taldi sig líklega hafa komist undan lögreglu, enda hátt í 30 ár síðan hann flúði úr fangelsi í Oregon. Líklega var það áfall þegar hann var svo handtekinn á þriðjudaginn.

Þegar Johnson flúði fangelsið í nóvember 1994 hafði hann setið inni í fimm ár eftir að hann var sakfelldur fyrir ítrekað barnaníð. Síðan hann strauk hefur hann verið ofarlega á lista yfir mest eftirlýstu strokufanga Bandaríkjanna enda þóttu miklar líkur á að hann héldi áfram að brjóta gegn ungum drengjum. Ekkert gekk þó að finna hann.

Það hefur komið á daginn að eftir flóttann þá stal Johnson persónuauðkenni barns sem lést árið 1962. Hann varð sér úti um afrit af fæðingarvottorði barnsins og tókst þannig að fá kennitölu í Texas árið 1995. Þremur árum síðar tókst honum jafnvel að fá ökuskírteini.  Hann var handtekinn á heimili sínu á þriðjudaginn, en þar bjó hann undir nafninu sem hann stal, William Cox.