Í herbergjunum var mikið rusl, þar á meðal notaðir smokkar og annað. Innan um ruslið fann starfsfólkið sönnunargögn um að áratugum saman og hugsanlega í rúmlega heila öld hafi sjálfskipuð aganefnd, sem aðhyllist nasisma, hrellt nemendur í háskólanum. Stóð nefndin fyrir undarlegum inntökuathöfnum og refsingum og fór þetta allt fram í þessum tveimur herbergjum.
Í herbergjunum var talan 88 áberandi og á mörgum stöðum. Þessi tala er þekkt tákn hvítra kynþáttahatara og nýnasista. 8 stendur fyrir áttunda bókstafinn í stafrófinu, H, og 88 er leyniorð fyrir „Heil Hitler“.
Háskólinn í Stellenbosch, sem er stærsta borgin í samnefndu vínhéraði, er þekkt sem höfuðvígi og útungarstaður hvítra þjóðernissinna. Hér var aðskilnaðarstefnan, apartheid, sem veitti hvíta minnihlutanum völd til að stjórna landinu og þar með lituðum íbúum þess, þróuð. Frá 1919 til 1978 komu allir forsætisráðherrar landsins úr röðum fyrrum nemenda eða kennara við skólann.
Hluti af skólanum er í hverfi sem var skilgreint sem hvítt á tíma aðskilnaðarstefnunnar. Mörg þúsund litaðir íbúar voru neyddir til að flytja þaðan til að hægt væri að koma háskólanum upp þar.
Í hinni nýju og lýðræðislegu Suður-Afríku, þar sem hvítt fólk er um 7% landsmanna, er háskólinn í Stellenbosch af mörgum talinn vera aftarlega á merinni hvað varðar jafnræði kynþáttanna.
Rúmlega 30.000 stúdentar stunda nám við skólann og er um helmingur þeirra hvítur. Skólinn þykir þó hafa fært sig nær jafnrétti kynþáttanna á síðustu árum. Margt litað fólk lítur á skólann sem leifar frá tíma aðskilnaðarstefnunnar og fréttin um leyniherbergin og helgiathafnir eru bein staðfesting á verstu grunsemdum þeirra.
Rannsóknarnefnd
Jótlandspósturinn segir að háskólinn hafi sett rannsóknarnefnd á laggirnar til að kafa ofan í málið. Hún á meðal annars rannsaka hvort starfsfólk skólans hafi vitað eða hylmt yfir þessi leynisamtök á heimavistinni. Þar hafa margir af hvítum framámönnum í viðskiptalífinu sem og fræðimenn búið og gætu því hugsanlega hafa verið félagar í samtökunum.
Það ætti ekki að reynast rannsóknarnefndinni erfitt að hafa upp á að minnsta kosti einhverjum af nemendunum því nákvæmar fundargerðir sem teygja sig langt aftur í tímann, og ljósmyndir sýna hvað gekk á og að vissu leyti hverjir tóku þátt.
