Rani fíls er sannkallað meistaraverk í þróunarsögunni. Raninn getur orðið rúmlega tveir metrar á lengd og er með rúmlega 40.000 vöðva og taugaenda. Þeir geta lyft allt að 270 kílóum en geta einnig auðveldlega tekið upp eina staka hnetu.
Þróun ranans hefur lengi verið ráðgáta fyrir vísindamenn en í nýrri rannsókn, sem hefur verið birt í „eLife“ kemur fram að hugsanlega hafi loftslagsbreytingar valdið því að ranar mynduðust á fílum.
Vísindamennirnir báru saman þrjár stórar fjölskyldur spendýra, sem líkjast fílum, í norðurhluta Kína. Þessar tegundir voru uppi fyrir 10 til 20 milljónum ára. Þeir rannsökuðu mismunandi líkamsbyggingu þessara tegunda vegna mismunandi fæðuöflunar þeirra og vistkerfanna sem þau lifðu í. Þessar þrjár tegundir eru forfeður fíla nútímans.
Chunxiao Li, aðalhöfundur rannsóknarinnar, sagði í samtali við Live Science að þessar fornu tegundir hafi verið sérstaklega áhugaverðar vegna þess að útlit þeirra hafi verið þannig að það gæti hafa haft áhrif á hvernig rani fíla þróaðist. Vitað sé að á þeim tíma, sem þessar tegundir lifðu á, hafi loftslagið breyst úr heitu og röku loftslagi í þurrara og kaldara þar sem meira hafi orðið um sléttur. Það hafi leitt til þess að dýrin þróuðu með sér rana til að geta rifið gras upp á sléttunum.