fbpx
Fimmtudagur 23.maí 2024
Fréttir

Gagnrýnir Bjarna og Guðmund harðlega: „Þeir voru bókstaflega hlæjandi á meðan hún talaði“

Ritstjórn DV
Þriðjudaginn 14. maí 2024 11:30

Ekki missa af Helstu tíðindum dagsins í pósthólfið þitt

Lesa nánar

„Vanvirðingin sem þessi ríkisstjórn sýnir öryrkjum er hömlulaus,“ segir Svanberg Hreinsson, varaþingmaður Flokks fólksins, í aðsendri grein á vef Vísis.

Svanberg, sem sjálfur er öryrki, segir að fólk í hans stöðu hafi lengi óttast það að sitjandi ríkisstjórn framkvæmi hótanir sínar um að innleiða starfsgetumat.

„Nú liggur fyrir að félags- og vinnumarkaðsráðherra, formaður Vinstri grænna, Guðmundur Ingi Guðbrandsson, ætlar að þvinga í gegnum þingið frumvarpi um endurskoðun örorku almannatrygginga sem inniheldur starfsgetumat.“

Svanberg vísar svo í ræðu sem Inga Sæland, formaður Flokks fólksins, flutti á Alþingi þann 10. apríl síðastliðinn þar sem hún skoraði á þingmenn að sjá myndina I, Daniel Blake sem fjallar um afleiðingar þess að innleiða starfsgetumat í Bretlandi. Um er að ræða mynd frá 2016 sem hlaut meðal annars BAFTA-verðlaunin árið 2017 sem mynd ársins.

„Í kjölfar innleiðingar starfsgetumats í Bretlandi sviptu um 4.000 einstaklingar sig lífi. Þessi mynd, segir í raun og veru allt sem segja þarf um þær embættisfærslur sem eru fyrirhugaðar frá hæstvirtum félagsmálaráðherra, um þá aðför sem hann hefur í huga gagnvart fötluðu fólki á Íslandi í dag,“ sagði Inga meðal annars í ræðu sinni.

Svanberg gagnrýnir viðbrögð Bjarna Benediktssonar forsætisráðherra og Guðmundar Inga Guðbrandssonar félagsmálaráðherra undir ræðu Ingu.

„Á meðan Inga ræddi um stóraukinn fjölda sjálfsvíga meðal öryrkja og fatlaðra í Bretlandi eftir að þeir voru dæmdir vinnufærir í nýju starfsgetumati sem innleitt var þar í landi, sátu nývígður forsætisráðherra Bjarni Benediktsson og félags- og vinnumarkaðsráðherra Guðmundur Ingi Guðbrandsson fyrir aftan hana á ráðherrabekknum. Ekki virtust þeir taka áhyggjur Ingu Sæland alvarlega, þar sem þeir voru bókstaflega hlæjandi á meðan hún talaði. Vanvirðingin sem þessi ríkisstjórn sýnir öryrkjum er hömlulaus.“

Svanberg segir að þrátt fyrir viðbrögð ráðherranna sé umræðan mjög brýn. Nú liggi fyrir frumvarp á Alþingi um umfangsmiklar breytingar á almannatryggingakerfinu á Íslandi. Segir Svanberg að þar verði rík áhersla lögð á starfsgetumat, svipuðu því sem innleitt var í Bretlandi.

„Ef við öryrkjar viljum komast hjá því að upplifa það sama óréttlæti og við höfum séð í Bretlandi þurfum við að láta heyra í okkur,“ segir hann meðal annars.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Fréttir
Fyrir 9 klukkutímum

„Áhorfendur áttu betra skilið“

„Áhorfendur áttu betra skilið“
Fréttir
Fyrir 9 klukkutímum

Þreföld eftirspurn eftir leiguhúsnæði miðað við framboð

Þreföld eftirspurn eftir leiguhúsnæði miðað við framboð