Hefur þú hugleitt hvað gerist þegar þú sturtar niður úr flugvélaklósetti? Sumir halda kannski að það sem fer þar niður fari beint út úr vélinni og hrapi til jarðar. En sem betur fer er það nú ekki svo.

Það sem lendir í flugvélaklósettum endar í sérstöku, innsigluðu rými aftast í flugvélum.

Eftir því sem Garrett Ray, flugmaður og áhrifavaldur á TikTok, segir þá er stundum sturtað allt að 1.000 sinnum niður úr klósettum í Boeing 747 í langflugi.

Hann segir einnig að á slíku langflugi safnist allt að 1.200 lítrar af „úrgangi“ í „úrgangsrýmið“.

Þegar vélarnar lenda er úrganginum dælt úr þeim með sérstökum búnaði og sjá flugvallarstarfsmenn um þetta.

Örsjaldan gerist það að mannlegur „úrgangur“ veldur því að lenda verður í skyndingu. Það gerðist þegar fyrirbæri, sem nefnist „blár ís“, á sér stað. Þá lekur frosinn úrgangur úr vélinni og hrapar þá auðvitað til jarðar þar sem hætta er á að hann lendi á fólki.

Þetta gerist mjög sjaldan en það er væntanlega lítil huggun fyrir breskan mann sem fékk væna gusu af bláu skólpi yfir sig þegar hann var úti í garðinum sínum í Windsor á Englandi.