CBS News segir að Ruiz hafi veitt kunningja sínum húsaskjól yfir nótt því hann var staddur langt að heiman. Þau sváfu í sitt hvoru rúminu en skyndilega réðst maðurinn á hana og nauðgaði. Hann hótaði síðan að drepa hana og þá greip Ruiz til varna og sló hann í höfuðið. Það varð honum að bana.
Þegar réttað var í málinu í upphafi gengu ásakanir á víxl á milli saksóknara og verjanda Ruiz. Saksóknarar sögðust efast um að Ruiz hefði verið nauðgað og héldu því fram að hún hefði reiðst þegar maðurinn vildi ekki stunda kynlíf með henni.
Verjandi hennar, Ángel Carrera, vísaði þessu á bug og sagði þessar ásakanir hreinan uppspuna. En Ruiz var dæmd í sex ára fangelsi fyrir morð.
Dómurinn vakti mikla reiði í Mexíkó og fjölmenntu konur á götur út til að mótmæla dómnum.
„Þetta er ekki réttlæti. Hafið í huga að ég er sú sem þessi maður réðst á og svo dó hann af því að ég varðist. Af því að ég vildi ekki deyja í höndum hans,“ sagði Ruiz eftir dómsuppkvaðninguna og bætti við að hún hafi einnig óttast um öryggi fjögurra ára dóttur sinnar.
En nú hafa nýjar og óvæntar vendingar orðið í málinu því Andrés Manuel López Obrador, forseti Mexíkó, hefur tilkynnt að hann ætli að náða Ruiz. Í kjölfarið tilkynnti saksóknari að hann hefði fallið frá ákærum á hendur Ruiz og verður hún því frjáls ferða sinna.