Flestir vita væntanlega að ef maður drekkur mikið magn áfengis þá getur það valdið höfuðverk. En sumir þurfa ekki að drekka nema eitt glas af rauðvíni til að fá höfuðverk. Nú telja vísindamenn sig vita ástæðuna fyrir því að sumir fá höfuðverk af svo litlu magni víns.

Í rannsókninni, sem hefur verið birt í vísindaritinu Scientific Reports Journal, segja vísindamennirnir að þeir hafi hugsanlega leyst gátuna um af hverju sumir fá höfuðverk þegar þeir drekka rauðvín.

Rauðvínshöfuðverkur, sem er ekki það sama og timburmannahöfuðverkur, krefst þess ekki að fólk drekki mikið magn af rauðvíni. Ástæðan er að í rauðvíni er Quercetin, sem er flavóníður, sem er plöntuefni. Þetta efni getur truflað getu líkamans til að brjóta alkóhól niður og þá safnast eiturefni fyrir sem geta valdið höfuðverk.

Quercetin er í mörgum tegundum grænmetis og ávaxta, þar á meðal í þrúgum. Magn quercetin í rauðvíni er miklu meira en í hvítvíni. En það útskýrir ekki af hverju sumir fá höfuðverk við að drekka eitt rauðvínsglas.

Vísindamennirnir rannsökuðu því tengslin á milli quercetin go ALDH2, sem er erfðafræðilegt afbrigði af ensími sem hjálpar líkamanum að brjóta áfengi niður.

Um átta prósent jarðarbúa eru með gallað afbrigði af ALDH2 og eiga því erfiðara með að brjóta áfengi niður og finna því fyrir meiri aukaverkunum af áfengi en aðrir.

Vísindamennirnir telja sig hafa sannað að quercetin hamli ALDH2 og geti haft svo mikil áhrif á suma að þeir fái höfuðverk þegar þeir drekka rauðvín.

Kenning þeirra hefur ekki enn verið reynd á fólki og því vekja vísindamennirnir athygli á að frekar rannsókna sé þörf til að sannreyna þessa kenningu þeirra.