Hafsvæðið á milli Flórída og Bahamaeyja er líklega eitt best rannsakað hafsvæði heims. En samt sem áður er þetta sama hafsvæði uppspretta mikillar ráðgátu. Á yfirborði sjávarins birtast oft hvítir blettir, sem líkjast skýjum, og hafa vísindamenn ekki enn fundið út af hvernig þeir myndast. NASA Earth Observatory skýrir frá þessu að sögn Videnskab.dk.
Í nýrri rannsókn, sem hefur verið birt í vísindaritinu Remote Sensing of Environment, reyna vísindamenn við University of South Florida að finna skýringu á þessu dularfulla fyrirbæri sem hefur valdið mörgum heilabrotum frá því á fjórða áratug síðustu aldar.
Þegar þessi hvítu „ský“ birtast í sjónum kallast það „whiting atburður“. Vísindamenn vita ekki af hverju blettir af þessu tagi myndast við Bahamaeyjar. Blettir af þessu tagi sjást einnig annars staðar í höfum og vötnum en við Bahamaeyjar birtast þeir oftar en venja er.
Sýni úr þessum blettum benda til að þeir innihaldi meira magn af ögnum sem innihalda mikið af karbónati.
Bahamaeyjar eru á svæði þar sem mikið er af karbónati undir sjónum en ekki er vitað hvort þessir dularfullu blettir eigi rætur að rekja til þess að það losni um karbónat og það fljóti upp á yfirborðið.
Rannsókn vísindamannanna leiddi í ljós að stærð blettanna, eða skýjanna, tengdist árstíðunum frá 2003 til 2020. Stærstu blettirnir birtust á milli mars og maí og aftur í október til desember. Stærð þeirra var að meðaltali 2,4 ferkílómetrar. Á heiðskírum dögum sýndu gervihnattarmyndir um 24 bletti og þöktu þeir um 32 ferkílómetra svæði.
En frá 2011 til 2015 stækkuðu blettirnir og þöktu rúmlega 200 ferkílómetra þegar þeir voru stærstir.
2019 minnkuðu þeir aftur en fóru þó ekki niður í þá stærð sem þeir voru í áður en þeir byrjuðu að stækka 2011.
Þetta bendir til að hugsanlega sé um 10 ára hringrás að ræða en vísindamenn vita ekki enn hvernig þessi hringrás er.
