Eldgosið í Meradölum hefur vakið athygli og undrun um allan hnöttinn. Fréttirnar af gosinu hafa borist alla leið til Ástralíu þar sem vefmiðillinn news.com.au fjallaði um það. „Tugir þúsunda hafa lagt leið sína eftir bröttum og ójöfnum stíg til að koma auga á virkt eldfjall eftir að það gaus í síðustu viku, spúandi brennandi kviku upp í himinninn,“ stóð í umfjöllun News og virðist vitna Ástralarnir í Þorvald Þórðarsson eldfjallafræðing.
Franska fréttastofan France24 fjallaði einnig um eldgosið og sagði söguna af bandaríska ferðamanninum Hather Hoff sem gerði sér leið að gosinu í síðustu viku og sagði að það væri lífsmarkmið hjá henni að sjá kviku. „Ég þurfti að sitjast niður og gráta örlítið því þetta er svo fallegt, svo miklar tilfinningar. Þetta er hrátt afl plánetunnar okkar,“ hafði hún að segja.
Gulf News, helsti fréttamiðill Sameinuðu arabísku furstadæmanna á ensku, birti einnig margar myndir af eldgosinu og lýsti því sem dáleiðandi.