Þetta kemur fram í umfjöllun Rolling Stones þar sem því er lýst hversu upptekin Trump var af ákveðnu máli í upphafi kjörtímabilsins. Hann er sagður hafa nánast „yfirheyrt“ embættismenn og öryggisráðgjafa um málið.
Þetta hugðarefni hans var hvort Kínverjar hefðu yfir leynilegri tækni að ræða, jafnvel vopni, sem gæti myndað öfluga fellibylji sem þeir gætu sent í átt að Bandaríkjunum. Og ef svo væri, hvort Bandaríkin gætu litið á það sem árás og goldið í sömu mynt.
Þetta er sagt hafa verið ofarlega í huga Trump 2017 og hafi hann haft orð á þessu öðru hvoru 2018. „Ég taldi hann ekki vera að grínast,“ sagði einn heimildarmaður Rolling Stones.
Annar heimildarmaður sagði: „Ég var eitt sinn viðstaddur þegar hann spurði hvort Kínverjar gætu búið til fellibylji sem væri hægt að nota gegn okkur. Einn viðstaddra sagði: „Ekki eftir því sem ég best veit, herra.“. Ég reyndi bara að halda andlitinu þar til ég kom aftur inn á skrifstofuna mína. Ég veit ekki hvar hann heyrði um þetta.“
En Trump missti ekki allan áhuga á fellibyljum eftir 2018 því ári síðar er hann sagður hafa spurt hvort hægt væri að nota kjarnorkusprengjur gegn fellibyljum og leysa þá þannig upp.
